Movie, Video

《逆時空狙擊》之忍唔X到

0




細佬尖咀拖板一向日理萬機,上次朋友開口我諗都唔諗就啪咗篇影評佢,你咪話我唔行義氣呀!

但本人堅懶嘅,講明第二篇就真係唔好搞住,等我再得閒多少少先繼續咁話啦,但估唔到今晚本來約咗班舊同學話出嚟食飯,又咁啱其中一位同學又要收9點喎,再咁啱有人話不如早啲出嚟睇場戲,仲要係睇我前排話想睇嗰套《逆時空狙擊》。無錯!我又係俾佢條Trailer深深吸引住,所以唔使講嘢,買飛睇戲啦!

故事好簡單講男主角係一個時空特工,佢就喺時空不斷穿梭為咗捉嗰件炸彈狂徒,講完。

時空穿梭嘅電影題材絕對係「賣飛佛」,我甚至本著睇我心目中十大必睇電影之一《The Butterfly Effect》 嚟作少少比較添,但佢老母呀!我咁嚟作少少比真係過份咗嘅!人哋套2015年新作我又點可能搵套10年前有多嘅作品同佢比較呢?無論人物、故事、編排、特技、過場、解釋,全部係我意料之外。

2013_05_02Predestinationonset_0092_1424229474

一開場一貫荷里活式明快剪輯時空交錯片段,令我喺短短10分鐘內完全墮入混亂思維狀態,但好一個荷里活導演呀,佢喺你有啲神智不清之時,突然嚟個180度轉移,以兩位主角喺酒吧嘅對話引進整個故事嚟個序章,細心嘅導演為咗表現兩位主角淋漓盡致嘅演技,全片98分鐘,導演大膽將開頭相當重要嘅大概60分鐘只以兩位主角特寫拍攝(呢種拍攝手法令我聯想起王家衛導演嘅《東邪西毒》同瓊瑤姐姐嘅《情深深雨濛濛》)。

對話當中女主角以故事mode去解釋自己從前係一個孤兒,一路以嚟都係一個無人鍾意嘅怪胎聰明女人,長大之後有個同佢夾到無倫嘅男人偶遇相愛,但無啦啦之後個男人突然失蹤咗,跟住佢咪發現自己有咗囉,以為咁樣就算呀?你太睇少導演嘅編排啦,女主角生咗BB出嚟之後先發覺自己係男女同體,兩揪嘢都有嘅,生完BB要成揪女性嘢切晒,咁點呀?變那咗男人囉!BB仲俾人喺醫院偷走埋添,我問你死未!

2013_04_23Predestination_0234_1424229472

望望手錶,套戲得返半粒鐘咋喎!我超期待嘅時空穿梭、槍林彈雨,緊張嘅追逐場面,華麗嘅特技場口應該會密不透風咁餵飽我,但我真係太睇少導演啦,佢餘下果半個鐘直頭將我推到另一次高峰,但其實我係咪唔應該劇透咁多㗎?

咁我講自己睇到嘅故事大綱出嚟算啦,我用我自己代入第一身嚟演繹,希望大家容易明啲呀。即係咁:我係一個孤兒,長大後係一位時空特工需要穿越時空追查炸彈狂徒係那誰?但唔知點解我穿越時空帶咗我返以前同我自己做愛,之後生咗我出嚟但俾我偷走再穿越時空返再之前放我响孤兒院長大,搞掂咗我再返去接我走返而家接我力做特工,我返自己時空退休唔玩發覺炸彈狂徒仲未捉到,最後發覺炸彈狂徒係之後嘅我……

OPEN-1160x820

似曾相識係咪?一套電影簡單將《未來戰士》1-3集致敬,另外嗰下時空穿梭嘅場口,我一眼就睇得出係對我哋粵語片嘅致敬啦。其實電影中有問過,到底有雞先定有蛋先?98分鐘完結之後,我同兩位同學互望咗一眼,之後換嚟嘅係一輪狂笑~導演,我哋卒之明白啦。

菩提本無樹

明鏡亦非臺

本來無一物

何處惹塵埃

無呢個男主角,根本就唔會有呢套戲,所以……男主角點解唔一早死咗呢?

P.S.: 其實而家啲影評打手又唔使咁離譜嘅,我朋友真係信㗎……其中一個留言「故事好,導演好,演員好,班底好。」我X你老母呀!


 




#以上文章由作者特約撰寫或授權提供,內容僅屬作者意見,並不代表網站立場。若分享內容有任何侵權,請來信通知,我們會盡快加上版權來源,若版權擁有者反對我們使用,我們會尊重版權法,盡快將相關內容移除。歡迎任何人和機構於社交媒體轉載文章連結,但未經書面授權不得轉載及拷貝文章全部內容,感謝支持。

About the author / 

尖咀拖板哥RayMond
尖咀拖板哥RayMond

本人咩都有,係無時間,所以唔喜煲劇只愛電影,如果知道電影有幾集都興趣大減,個幾兩個鐘就可以睇一個故事,我覺得超級抵。

Related Posts